Մատենադարանի զարգացման ծրագրի դրույթների համաձայն՝ ցուցադրական գործունեության կարևոր ուղղություններից մեկը ներառականությունն է։ Հայ օգնության ֆոնդի «Այո» ֆոնդահայթայթման հարթակի, ինչպես նաև «Ջինիշյան» հիշատակի հիմնադրամի հովանավորությամբ, «Սարեր» մշակութային հասարակական կազմակերպության գործակցությամբ և համադրմամբ փորձագետ Սիփան Ասատրյանի, միջնադարյան մանրանկարչական գլուխգործոցներն այսուհետև հասանելի կլինեն տեսողության խնդիրներ ունեցող այցելուներին։
Ինչպես նշեց տնօրեն Արա Խզմալյանը՝ սա ոչ միայն կառավարչական և մասնագիտական խնդիր է, այլև քաղաքակրթական հայտ։ Նրա խոսքով՝ հասարակությունների և ազգերի քաղաքակիրթ լինելու չափանիշներից մեկն էլ բոլոր քաղաքացիների համար հավասար հնարավորությունների և հասանելիության ապահովումն է։
Ելույթներով հանդես եկան ՀՀ ԿԳՄՍ նախարար Ժաննա Անդրեասյանը և ՀՀ մարդու իրավունքների պաշտպան Անահիտ Մանասյանը, որոնք մեծապես կարևորեցին նախագիծը՝ ընդգծելով դրա նշանակությունը թե՛ մասնագիտական, թե՛ բարոյահոգեբանական և իրավական տեսանկյուններից։ ՀՀ ԿԳՄՍ նախարար Ժաննա Անդրեասյանը ողջույնի խոսքում շնորհակալություն է հայտնել Մատենադարանի թիմին և գործընկերներին ստեղծագործական ջանքի և արժեքավոր արդյունքի համար. «Այսօրինակ նախաձեռնությունների շնորհիվ Մատենադարանի հատկապես թանգարանային հատվածն առավել տեսանելի է դառնում մեր հանրային և մշակութային կյանքում, և մենք անընդհատ Մատենադարան վերադառնալու առիթներ ենք ունենում»:
Ծրագիրն ամփոփեց «Կողք կողքի» ներառական երաժշտական փառատոնի մասնակից Արեգ Գալստյանը՝ Կոմիտասի երգերի կատարումով։
