«ՏՊԱԳՐՈՒԹՅԱՆ ՄԱՐԳԱՐԻՏ» ՄԻՋԱԶԳԱՅԻՆ ԳԻՏԱԺՈՂՈՎԸ ՄԵԿՆԱՐԿԵՑ

Սեպտեմբերի 19-ին Մեսրոպ Մաշտոցի անվան Մատենադարանում մեկնարկեց «Տպագրության մարգարիտ» խորագիրը կրող միջազգային գիտաժողով՝ նվիրված Ոսկան Երևանցու տպագրությամբ հայերեն առաջին Աստվածաշնչի 350-ամյակին (ծրագիրը տե՛ս այստեղ):
Հայ տպագիր գրքին նվիրված միջոցառումների շարքը սկսվեց 2012 թ., երբ Հայ գրատպության 500-ամյակին ընդառաջ ՅՈՒՆԵՍԿՕ-ի որոշմամբ Երևանը հռչակվեց գրքի համաշխարհային մայրաքաղաք: Հայ գրատպությանը նվիրված հոբելյանական միջոցառումների շղթան ամփոփվում է հայերեն առաջին տպագիր Աստվածաշնչի 350-ամյակի առթիվ կազմակերպված «Տպագրության մարգարիտ» խորագիրը կրող ծրագրով:
«Տպագրության մարգարիտ» միջազգային գիտաժողովի բացման խոսքով հանդես եկավ Մատենադարանի տնօրենի պաշտոնակատար Վահան Տեր-Ղևոնդյանը: Վերլուծելով առաջին տպագիր Աստվածաշնչի ստեղծման պատմական նախադրյալները՝ տնօրենի պաշտոնակատարը նշեց, որ «մեր ազգի համար բախտորոշ նշանակության մշակութային նվաճումները միշտ էլ պայմանավորված են եղել մի շարք հանգամանքներով, որոնք ժամանակի ու տարածության տվյալ կետում համընկել են ու հանգեցրել թռիչքաձև զարգացման: Այս նույն մոտեցումը կիրառելի է նաև Ոսկան Երևանցու Ամստերդամում հրատարակած Աստվածաշունչ Գրքի համար, որն իրավամբ համարվում է մեր մշակութային գագաթներից մեկը»:
Ելույթով հանդես եկավ ՀՀ Արտաքին գործերի փոխնախարար Աշոտ Հովակիմյանը: Ա. Հովակիմյանը գիտաժողովի մասնակիցներին ներկայացրեց ՅՈՒՆԵՍԿՕ-ի հետ համագործակցության շրջանակներում իրականացվող միջոցառումների շարքի վերաբերյալ մի շարք դիտարկումներ: Այնուհետև, խոսելով «Տպագրության մարգարիտ» միջազգային գիտաժողովի մասին, ՀՀ փոխարտգործնախարարն ընդգծեց վերոհիշյալ կոնֆերանսի կարևորությունը, քանի որ «սույն ծրագրի իրականացումը հրաշալի առիթ է մեկ անգամ ևս արժևորելու Սուրբ Գրքի դերը հայերի համար: Աստվածաշնչի տպագրությունը նաև փաստացի ցույց է տալիս մեր ժողովրդի և եվրոպական մի շարք երկրների մշակութային և այլ փոխհարաբերությունների բարձր մակարդակը»: Ա. Հովակիմյանը գիտաժողովին մաղթեց հաջող ընթացք և արդյունաշատ աշխատանք:
Գիտաժողովի մասնակիցներին ողջույնի խոսք ասաց նաև ՀՀ Ազգային գրադարանի տնօրեն Տիգրան Զարգարյանը: Վերջինս խոսեց Ոսկան Երևանցու գործունեության դժվարության և այդ գործունեության պտուղների անասելի նշանակության մասին:
Գիտաժողովի մասնակիցներին Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի Հայրապետական պատգամը փոխանցեց Տ. Զաքարիա վարդապետ Բաղումյանը:
«Մաշտոց» հայ մշակույթի պահպանման և զարգացման հիմնադրամի նախաձեռնությամբ իրականացվող սույն գիտաժողովին հաջորդեց հայերեն առաջին տպագիր Աստվածաշնչի լավագույն նմուշների, ինչպես նաև հնատիպ այլ գրքերի ցուցադրությունը, որն իրականացվում է Մայր Աթոռ Սուրբ Էջմիածնի և Հայաստանի Ազգային գրադարանի համագործակցությամբ։

Կիսվել