Վերականգնման բաժինը կազմավորվել է Մատենադարանի՝ Երևան տեղափոխվելու տարեթվին՝ 1939թ.: Ներկայումս այն միակ նմանատիպ կառույցն է տարածաշրջանում: Բաժինը զբաղվում է խոնավության, կրակի, սնկերի, մանրէների, կրծողների ու միջատների քայքայիչ ազդեցությանը ենթարկված թղթյա և մագաղաթյա ձեռագրերի, արխիվային փաստաթղթերի, մանրանկարների և գրաֆիկական աշխատանքների կոնսերվացմամբ և վերականգնմամբ:
Բաժինը կահավորված է ժամանակակից սարքավորումներով և աշխատում է բացառապես ավանդական մեթոդներով՝ կիրառելով պահպանող-վերականգնողների եվրոպական կազմակերպությունների դաշնության (E.C.C.O.) կողմից երաշխավորված նորագույն տեխնոլոգիաներ:
Բաժնի գործունեության շրջանակներն են՝
• ձեռագրերի և վավերագրերի միկրոկենսաբանական և միջատաբանական զննում, դրանց հետագա ախտահանում և բուժում:
• թանաքների թթվայնության որոշում և չեզոքացում
• բոլոր տեսակի կաշվե կազմերի վերականգնում և պահպանում
• մագաղաթի փափկեցում, ձևախախտումների և այլ վնասվածքների վերացում և վերականգնում
• ձեռագրերի, հնատիպ գրքերի և վավերագրերի կոնսերվացում, պատռվածքների ամրացում, թերթերի կորսված մասերի վերականգնում, մանրանկարների վիճակի զննում և ամրացում
• միջնադարյան արծաթակազմ ձեռագրերի կազմերի նորոգում և դրանց վերակազմում իրենց սկզբնական տեսքով
• նոր, բուսական ծագում ունեցող հականեխիչ և հակասնկային նյութերի ուսումնասիրում և նրանց փորձարկման ուղիների որոնում
• ժամանակակից սարքավորումներով միջնադարյան հայկական ձեռագրերի պիգմենտների քիմիական կառուցվածքների խորացված ուսումնասիրում, ներկերի ամրացման նոր ուղիների որոնում
• Մատենադարանի ձեռագրերի, հնատիպ գրքերի և վավերագրերի ֆիզիկական վիճակի մշտադիտարկում
• միջնադարյան թղթերի և մագաղաթի ծերացման ընթացքը կասեցնելու նոր, ոչ տոքսիկ պոլիմերային նյութերի ուսումնասիրում
• Միջնադարյան կաշիների վիճակի ուսումնասիրում, խմբավորում ըստ դաբաղման տեսակի և վնասվածության աստիճանի, փափկեցման համար անհրաժեշտ յուղանյութերի ստեղծում:
• մասնագետների ուսուցում և վերապատրաստում:
Բաժինը գործակցում է արտասահմանյան հայտնի կենտրոնների հետ (Բեռլինի ազգային գրադարան, Իտալիայի Գրքերի պաթոլոգիայի ինստիտուտ, Սանկտ Պետերբուրգի Էրմիտաժ թանգարան, Ռուսաստանի պետական գրադարան, Գրաբարի վերականգնման կենտրոն (Մոսկվա), Լոնդոնի թագավորական քոլեջ, Հռոմի ‹‹Լա Սապիենցա›› համալսարան, Սանկտ Պետերբուրգի ‹‹Ռոսֆոտո›› միավորում):
Վերականգնման բաժինը Մատենադարանի հավաքածուների պահպանման և վերականգնման աշխատանքներից բացի աշխատանքներ է տանում Հայաստանի թանգարանների և գրադարանների, ինչպես նաև սփյուռքի նույնատիպ հավաքածուների կոնսերվացման և վերականգնման ուղղությամբ:


Բաժնի վարիչ՝ Գայանե Էլիազյան
քիմիական գիտությունների թեկնածու
Հեռ.` +374 (010) 513017, ներքին` 1-30

Կիսվել