ԽՈՐԱՆԱՇԱՏԻ ՎԱՆԱԿԱՆ ՀԱՄԱԼԻՐԻ ՀԻՄՆԱԴՐՄԱՆ 800-ԱՄՅԱԿԸ

Այս տարի նշվում է Խորանաշատի վանական համալիրի հիմնադրման 800-ամյակը: Այդ առթիվ մայիսի 28-ին Խորանաշատի Սբ. Աստվածածին եկեղեցում​ Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանը մատուցեց Սուրբ և Անմահ Պատարագ։ Այդ նպատակով վանական համալիր բերվեց Մաշտոցյան Մատենադարանում պահվող 1224 թ. «Խորանաշատի Ավետարանը»։ Նույն օրը Չինարի գյուղում, իսկ հաջորդ օրը Բերդի Սբ. Հարություն եկեղեցում «Խորանաշատի Ավետարան»-ով կատարվեց Անդաստանի կարգ:
Մայիսի 29-ին Չինարի գյուղի մշակույթի տանը Մատենադարանի և ՀՀ ԳԱԱ Պատմության ինստիտուտի նախաձեռնությամբ տեղի ունեցավ​ գիտաժողով՝ նվիրված Խորանաշատի հիմնադրման 800-ամյակին։ Ողջույնի խոսքով հանդես եկան Գերաշնորհ Տեր Բագրատ եպիսկոպոս Գալստանյանը, ՀՀ ԿԳՄՍ նախարար Վահրամ Դումանյանը, Մատենադարանի տնօրեն Վահան Տեր-Ղևոնդյանը, ՀՀ ԳԱԱ Պատմության ինստիտուտի տնօրեն Աշոտ Մելքոնյանը, «Խորանաշատ ֊800» միջգերատեսչական հանձնաժողովի անդամ, միջոցառումների համակարգող Գևորգ Սաղոյանը։
Գիտաժողովի շրջանակներում տեղի ունեցավ «Խորանաշատ 800»​ ուսումնասիրություն֊պատկերագրքի (հեղինակներպ.գ.թ. Արտաշես Շահնազարյան, բ.գ.թ. Թամարա Մինասյան, Տ.Արամ քհն Միրզոյան, Հրաչյա Քարտաշյան, խմբագիր Վահե Թորոսյան) շնորհանդեսը։ Այն հրատարակվել է նաև անգլերեն (թարգմանիչներ Իրինա Օձնեցյան, Վարդուհի Գևորգյան, խմբագիր Նազենի Ղարիբյան) և ռուսերեն (թարգմանիչ Ամալյա Շահումյան, խմբագիր Օլգա Վարդազարյան) լեզուներով։ «Խորանաշատ 800»​ ուսումնասիրություն֊ պատկերագիրքը հրատարակվել է Անատոլի Սաղոյանի ընտանիքի մեկենասությամբ (տե՛ս թվային տարբերակը
Գիտաժողովում ներկայացվեցին հետևյալ զեկուցումները.
1. Արտաշես Շահնազարյան (Պատմության ինստիտուտ), Վանականն ու Խորանաշատի վարդապետարանը:
2. Գևորգ Տեր-Վարդանյան (Մաշտոցյան Մատենադարան), Վանական վարդապետի մատենագրական ժառանգությունը:
3. Հրաչյա Քարտաշյան, Խորանաշատի ճարտարապետական համալիրը (զեկուցող`Վահագն Քարտաշյան):
4. Թամարա Մինասյան (Մաշտոցյան Մատենադարան), Խորանաշատի ձեռագրական ժառանգություն:
5. Վահե Թորոսյան (Մաշտոցյան Մատենադարան, Պատմության ինստիտուտ), Հայ-լատին եկեղեցական հարաբերությունները 13-րդ դարի կեսերին և Վանական վարդապետը:
6. Տեր Արամ քահանա Միրզոյան (Բերդի տարաշրջանի հոգևոր հովիվ), Վանական վարդապետի սրբադասման հարցը:

Կիսվել