![](https://matenadaran.am/wp-content/uploads/2022/07/295429571_1229102214508515_8009221982648955074_n-1024x642.jpg)
2022 թ. հուլիսի 15-19-ին ԵՊՀ Աստվածաբանության ֆակուլտետում և ՀԱԵ Վայոց Ձորի թեմում տեղի ունեցավ Արցախի մշակութային ժառանգությանը նվիրված միջազգային և միջառարկայական գիտաժողով։ Նախաձեռնությունը Գերմանիայի Գյոթինգենի համալսարանի պրոֆեսոր Մարտին Թամքեինն էր, կազմակերպիչներն էին Քիլի համալսարանի պրոֆեսոր Անդրեաս Մյուլլերը, Բենսհայմի միջեկեղեցական հետազոտական ինստիտուտի տնօրեն Դագմար Հելլերը և Հայաստանի Ամերիկյան համալսարանի դասախոս ու ԵՊՀ Միջմշակութային կրոնագիտական կենտրոնի գիտաշխատող Հարություն Հարությունյանը։
Նախաձեռնության անդամների խոսքով. «Միջազգային գիտաժողովի կազմակերպումը կարևորվում է հատկապես ներկա իրավիճակում, քանի որ Ադրբեջանը վերջին պատերազմից հետո իր հսկողության ներքո անցած տարածքներում ցանկանում է վերացնել հայոց պատմության հետքերն իբրև կարծեցյալ կեղծիքներ։ Այսպիսով, խիստ անհրաժեշտ է դառնում տարածաշրջանի մշակութային ժառանգության գիտական և համաչափ վերլուծությունը, որն էլ կիրականացվի այս միջառարկայական ու միջազգային նախաձեռնության շրջանակում»։
![](https://matenadaran.am/wp-content/uploads/2022/07/295427742_1229102227841847_4788360241951410526_n-803x1024.jpg)
![](https://matenadaran.am/wp-content/uploads/2022/07/295577517_1229102211175182_2233022071903874551_n-755x1024.jpg)
Ի թիվս Հայաստանի, Արցախի և Եվրոպայի ճանաչված մասնագետների, գիտական զեկույցներով հանդես եկան նաև Մաշտոցյան Մատենադարանի տնօրեն Վահան Տեր-Ղևոնդյանը և ավագ գիտաշխատողներ Թամարա Մինասյանը, Լուսինե Թումանյանն ու Արմինե Մելքոնյանը։ Նրանք ներկայացրին Արցախի և Ուտիքի պատմությունն իր հարուստ ձեռագրական ժառանգությամբ, Արցախի առաքելական ժառանգությունը, Քարվաճառ բնակավայրը XV դ. հայերեն ձեռագիր հիշատակարանում և Հովսեփ Արցախեցու գրական ժառանգությունը։
Գիտաժողովի եզրափակիչ նիստը, որը նվիրված էր Արցախի արվեստին ու մշակույթին, վարեց և գերմաներեն թարգմանությանն աջակցեց Մատենադարանի ավագ գիտաշխատող Անահիտ Ավագյանը։
![](https://matenadaran.am/wp-content/uploads/2022/07/295405640_1229102381175165_8235834016163497255_n-1024x688.jpg)