«Ցուցակ Մատենադարանի եբրայերէն ձեռագրաց», Կազմող՝ Ռուզան Պօղոսեան, Երևան, «Նաիրի» հրատարակչություն, 142 էջ
Հատորն ընդգրկում է Մաշտոցի անվան Մատենադարանի Այլալեզու ֆոնդերում պահվող եբրայերեն ձեռագրերի ու պատառիկների ամբողջական հավաքածուի մանրամասն նկարագրությունը։ Այն նախատեսված է ձեռագրագետների, եբրայագետների և Աստվածաշնչի եբրայերեն բնագրերով հետաքրքրվողների համար։
Ձեռագրացուցակում յուրաքանչյուր ձեռագրի նկարագրության մեջ ներկայացված են ձեռագրի թերթերի քանակի, մեծության, նյութի, կազմի, վիճակի, գրչության ժամանակի, վայրի և գրչի մասին տվյալներ։ Եբրայերեն ձեռագրերի մեջ մեծ թիվ են կազմում Հին Կտակարանի «Ծնունդք», «Ելք», «Թիւք», «Ղեւտական», «Երկրորդումն օրինաց» գրքերի ամբողջական կամ մասնակի ընդօրինակությունները, իսկ գիտական առումով հատկապես արժեքավոր է Հմր 148 ձեռագիրը, որը ոչ թե Հնգամատյանի ընդօրինակությունն է, այլ նրա մեկնությունը, և ուսումնասիրության նյութ կարող է դառնալ աստվածաբանությամբ զբաղվողների համար։
Մատենադարանի եբրայերեն ձեռագրերի ամբողջական ցուցակը կազմելու աշխատանքները բարդացրել են ձեռագրերի մեծ մասի գրադաշտի վնասվածության, տեղ-տեղ պատռվածության, անընթեռնելիության հանգամանքները։ Ձեռագրերը կարիք են ունեցել ախտահանման և նորոգման։ Խիստ քայքայված ու վարակված ձեռագրերից մի քանիսն արդեն իսկ նորոգվել են։
Աշխատությունը հրատարակվել է ՋեյԹիԱյ Արմենիա» ՓԲԸ նվիրատվությամբ և «Մատենադարանի բարեկամներ» հիմնադրամի աջակցությամբ։