«Դպրոցական Մատենադարան» կրթամշակութային ծրագիրն ավարտել է շրջիկ ցուցահանդես-վարպետաց դասերը ՀՀ մարզերում: Ապրիլին մեկնարկած ծրագիրն իրագործվել է Վայոց ձորի, Գեղարքունիքի ու Արարատի մարզերում: Նախատեսված 16 դասերի փոխարեն դպրոցականների հետ անցկացվել է 18 հանդիպում, որին մասնակցել է 550 աշակերտ՝ նախատեսված 480-ի փոխարեն:
Ծրագիրը, որ իրականացվում է ՀՀ ԿԳՄՍ նախարարության դրամաշնորհով և Մատենադարանի համատեղ ֆինանսավորմամբ, մարզային դպրոցների աշակերտներին ներկայացրել է ձեռագրերի ընդօրինակման, նկարազարդման և վերականգնման արվեստը: Երեխաները մեծ հետաքրքրությամբ էին մասնակցում դասընթացի ինչպես գործնական, այնպես էլ տեսական պարապմունքներին: Նրանք գիտելիքներ ստացան նաև Մատենադարանի ստեղծման, հայկական միջնադարյան մշակույթի պատմության մասին։