Ողջույնի խոսքով հանդես են եկել Մատենադարանի տնօրեն Արա Խզմալյանը, ՀՀ ԿԳՄՍ նախարար Ժաննա Անդրեասյանը, ՀՀ-ում Գերմանիայի Դաշնային Հանրապետության արտակարգ և լիազոր դեսպան Կլաուդիա Բուշը։
Միջոցառմանը ներկա են եղել Հայաստանում ԵՄ պատվիրակության ղեկավար, դեսպան Վասիլիս Մարագոսը, ՀՀ-ում Իտալիայի Հանրապետության արտակարգ և լիազոր դեսպան Ալեսսանդրո Ֆերրանտին, ինչպես նաև գիտության և մշակույթի գործիչներ։
Նորագյուտ կառույցը հայտնաբերվել է հայ-գերմանական «Արտաքսատա» համատեղ ծրագրի շրջանակում իրականացված հետազոտությունների ընթացքում։ Ծրագիրն իրականացվում է ԳԱԱ Հնագիտության և ազգագրության ինստիտուտի և Մյունստերի համալսարանի Անտիկ և քրիստոնեական շրջանի հնագիտության ինստիտուտի համագործակցությամբ։
Ցուցադրության շրջանակում Մյունստերի համալսարանի հնագիտության թանգարանի տնօրեն, համալսարանի պրոֆեսոր Ախիմ Լիխտենբերգերը ներկայացրել է Արտաշատի պեղումների ընթացքում հայտնաբերված բացառիկ նյութերը, կառույցի ճարտարապետական առանձնահատկությունները, գիտական վերականգնման ընթացքը, ինչպես նաև նորագույն հետազոտական մեթոդների կիրառման արդյունքները։
Պեղումների ընթացքում հայտնաբերված նյութերի և ածխածնային թվագրման արդյունքների հիման վրա եկեղեցու հիմնման ժամանակաշրջանը վերագրվում է IV դարի առաջին քառորդին։ Հետազոտողները ենթադրում են, որ այդ ժամանակաշրջանը համընկնում է Տրդատ Մեծի և Գրիգոր Լուսավորչի ժամանակաշրջանի եկեղեցաշինության հետ։
Ցուցադրության բացմանը հաջորդել է աշխատարան-քննարկումը։
