ԶՄՄԱՌԻ ՄԱՅՐԱՎԱՆՔՈՒՄ ՄԱՏԵՆԱԴԱՐԱՆԻ ՏՆՕՐԵՆ ԱՐԱ ԽԶՄԱԼՅԱՆՆ ԱՐԺԱՆԱՑԵԼ Է ԵՐԱԽՏԱԳՐԻ

Զմմառի Մայրավանքում տեղի է ունեցել Մեսրոպ Մաշտոցի անվան Մատենադարանի տնօրեն Արա Խզմալյանին երախտագիր հանձնելու հանդիսավոր արարողություն՝ ի գնահատումն հայ ձեռագրական ժառանգության պահպանության գործում ունեցած նշանակալի ներդրման և Զմմառի Մայրավանքի հետ համագործակցության զարգացմանն ուղղված ջանքերի։
Վերջին երեք տարիներին Մատենադարանի և Զմմառի Մայրավանքի միջև ձևավորված մասնագիտական համագործակցությունը նշանակալի արդյունքներ է ապահովել ձեռագրական ժառանգության պահպանության ոլորտում։ Համատեղ աշխատանքի կարևոր ձեռքբերումներից է Զմմառի նոր ձեռագրատան և դիվանի ստեղծումը, որի իրականացմանը մասնագիտական աջակցություն են ցուցաբերել Մատենադարանի վերականգնող մասնագետները։
Երախտագրի հանձնումը երկու հաստատությունների միջև ձևավորված փոխվստահության և արդյունավետ գործընկերության գնահատանքի արտահայտություն է։