![](https://matenadaran.am/wp-content/uploads/2021/11/260644330_1075988796486525_6503861842636530695_n-1024x683.jpg)
Նոյեմբերի 25-ին Մաշտոցյան Մատենադարանում տեղի ունեցավ Արևելագիտության բաժնի ավագ գիտաշխատող, պ.գ.դ. Քրիստինե Կոստիկյանի «Մատենադարանի պարսկերեն հրովարտակները» գրքի շնորհանդեսը և Իրանի Ղաջարական դարաշրջանի մշակույթին նվիրված ցուցադրության բացումը։Քրիստինե Կոստիկյանի կազմած պրակում պատճեններով, բնագրերով, հայերեն ու անգլերեն թարգմանությամբ ներկայացված են Իրանի Ղաջարական իշխանությունների կողմից 1798-1829 թթ․ հրապարակված 96 հրովարտակներ, որոնք պահվում են Երևանի Մ․ Մաշտոցի անվան Մատենադարանում։ Ժողովածուի առաջաբանում քննվում է ընդգրկված վավերագրերի պատմագիտական արժեքը հայագիտության և հայ-իրանական հարաբերությունների ուսումնասիրման համար։Հրովարտակները հրապարակվել էին Այսրկովկասի շուրջ զարգացող ռուս-իրանական հակամարտության և պատերազմների շրջանում, ուստիև հայ-իրանական փոխհարաբերությունների, Երևանի խանության այդ ժամանակահատվածի պատմության կարևորագույն սկզբնաղբյուրներից են։ Աշխատությունը Մատենադարանի «Պարսկերեն վավերագրեր» մատենաշարի հերթական պրակն է։ Մատենաշարի առաջին հատորները 1950-60-ական թթ. կազմել է 20-րդ դարի խոշորագույն իրանագետ Հակոբ Փափազյանը:
Գիրքը հրատարակվել է «Գուրգեն Մելիքյանի Քաշաթաղի բազմազավակ ընտանիքներ» հիմնադրամի հովանավորությամբ:
Ցուցահանդեսի շրջանակում ներկայացվել են Մատենադարանում առկա Ղաջարական դարաշրջանի նկարազարդ ձեռագրեր, հրովարտակներ, այդ ժամանակաշրջանին բնորոշ ինքնատիպ կազմեր և Իրանի Նասեր Էդ-Դին շահի անձնական լուսանկարիչ Իրանում գեղարվեստական լուսանկարչության հիմնադիր Անթուան Սևրուգինի գործերը։ Առաջին անգամ ցուցադրվել են արվեստաբան, Մատենադարանի ավագ գիտաշխատող, ցուցահանդեսի համադրող Իվեթ Թաջարյանի անձնական հավաքածուից դեկորատիվ-կիրառական արվեստի նմուշներ, գործվածքներ և տարազ։
![](https://matenadaran.am/wp-content/uploads/2021/11/260988424_1075988203153251_1247645741196145361_n-1024x683.jpg)
![](https://matenadaran.am/wp-content/uploads/2021/11/261024954_1075988456486559_3912569448517897274_n-1024x763.jpg)
![](https://matenadaran.am/wp-content/uploads/2021/11/261343033_1075988703153201_5048479509173406706_n-1024x683.jpg)
![](https://matenadaran.am/wp-content/uploads/2021/11/261272294_1075988519819886_5035539188093904057_n-1024x683.jpg)
![](https://matenadaran.am/wp-content/uploads/2021/11/261044329_1075988826486522_3416475265883594137_n-1024x683.jpg)
![](https://matenadaran.am/wp-content/uploads/2021/11/260953249_1075988943153177_591139189160734828_n-1024x683.jpg)
![](https://matenadaran.am/wp-content/uploads/2021/11/261423588_1075988769819861_8293426591460463269_n-1024x683.jpg)