![](https://matenadaran.am/wp-content/uploads/2022/10/311846808_491846302970772_7894390005086039642_n.jpg)
Հոկտեմբերի 28-ին Մաշտոցյան Մատենադարանում տեղի ունեցավ անվանի հայագետ, պատմաբան Կլոդ-Արմեն Մութաֆյանի «Երուսաղեմը և հայերը» գրքի շնորհանդեսը:
Մութաֆյանի նոր գիրքը նվիրված է հայկական Երուսաղեմին։ Գրքում ներկայացված են Երուսաղեմի Հայոց պատրիարքարանում և Սուրբ քաղաքում պահվող հայկական նշխարները՝ սկսած 5-րդ դարից։ Այստեղ ընթերցողը կգտնի Երուսաղեմի տարբեր եկեղեցիներում պահպանվող հայերեն արժեքավոր ձեռագրեր հայատառ խճանկարներ, Կիլիկիայի թագավորների գավազաններ, պատրիարքարանում պահվող և Սալահ ադ-Դինին վերագրվող արտոնագիրը։
![](https://matenadaran.am/wp-content/uploads/2022/10/311958838_491846176304118_4321838439968756923_n-2-1024x683.jpg)
![](https://matenadaran.am/wp-content/uploads/2022/10/312464279_491846189637450_1511208256266117160_n-1024x683.jpg)
Գրքի շնորհանդեսին մասնակցում էին ՀՀ ԿԳՄՍ նախարար Վահրամ Դումանյանը, ԿԳՄՍ նախարարի տեղակալ Արա Խզմալյանը, ԿԳՄՍՆ մշակութային ժառանգության և ժողովրդական արհեստների վարչության պետ Աստղիկ Մարաբյանը, մեծ թվով հյուրեր և մատենադարանցիներ:
Մատենադարանի տնօրեն Վահան Տեր-Ղևոնդյանը ներկայացրեց Մութաֆյանի ներդրումը Կիլիկյան Հայաստանի և Մերձավոր Արևելքի հայկական գաղթօջախների պատմության ուսումնասիրման, ինչպես նաև հայոց պատմությանն ու մշակույթին նվիրված ցուցահանդեսների կազմակերպման գործում:
![](https://matenadaran.am/wp-content/uploads/2022/10/312425167_491846372970765_5189970790406317848_n-1024x683.jpg)
![](https://matenadaran.am/wp-content/uploads/2022/10/312328662_491846199637449_1440685006662321983_n-1024x683.jpg)
ԿԳՄՍ նախարար Վահրամ Դումանյանը, շնորհակալություն հայտնելով և շնորհավորելով Մութաֆյանին 80-ամյակի առիթով, կարևորեց նրա դերը Ֆրանսիայում հայագիտության զարգացման, Հայոց ցեղասպանության միջազգային ճանաչման գործում:
Հայ մշակույթի պահպանման, հայագիտության զարգացման ու հանրահռչակման գործում մեծ ավանդ ունենալու համար Հայաստանի Հանրապետության նախագահի 2022 թվականի հոկտեմբերի 21-ի հրամանագրով Կլոդ-Արմեն Մութաֆյանին շնորհվել է «Մովսես Խորենացի» մեդալը, որը վաստակաշատ պատմաբանին հանձնեց նախարար Վահրամ Դումանյանը:
Երեկոյի վերջում պատմական գիտությունների դոկտոր Ազատ Բոզոյանը ներկայացրեց «Արևելյան աղբյուրագիտություն» շարքի 3-րդ հատորը, որը ամբողջությամբ նվիրված է Արմեն Մութաֆյանի 80-ամյակին:
![](https://matenadaran.am/wp-content/uploads/2022/10/312238897_491846316304104_858019987828151087_n-1024x683.jpg)