![](https://matenadaran.am/wp-content/uploads/2024/04/435175049_828197246002341_7169835248571793893_n-1024x768.jpg)
Իտալիայի այցի շրջանակում Մատենադարանի պատվիրակությունը եղել է Ֆլորենցիայի Opificio delle Pietre Dure կենտրոնում և Հռոմի Գրքերի և արխիվային փաստաթղթերի պաթոլոգիայի կենտրոնական ինստիտուտում։
Այցելություններին ներկա է եղել նաև Մատենադարանի նորաստեղծ Ձեռագրերի կենսաքիմիական հետազոտությունների խմբի անդամ Լուսինե Մարգարյանը։
Կազմակերպվել է շրջայց հետազոտական բոլոր լաբորատորիաներում, ներկայացվել են լաբորատոր ենթակառուցվածքներն ու սարքավորումները։ Առանձին անդրադարձ է կատարվել կենտրոնների ուսումնական բաժիններին, ինչը կարևոր է հատկապես Մատենադարանում առաջիկայում ներդրվելիք «Գրավոր ժառանգության վերականգնում» մագիստրոսական ծրագրի տեսանկյունից։
Տնօրենությունը պաշտոնապես հրավիրել է երկու կառույցների մասնագետներին աշնանը Մատենադարանում կայանալիք «Հիշողության կերպարանքները․ ձեռագիր և տպագիր ժառանգության վերականգնման նորագույն տեխնոլոգիաները» միջազգային սեմինարին, որի շրջանակում կստորագրվի Հռոմի Գրքերի և արխիվային փաստաթղթերի պաթոլոգիայի կենտրոնական ինստիտուտի հետ լրամշակված հուշագիրը։
Մատենադարանի Վերականգնման բաժնի աշխատակիցների մասնագիտական կարողությունների և ենթակառուցվածքների կատարելագործումը, ինչպես և միջազգային կապերի ընդլայնումը Մատենադարանի զարգացման ծրագրի առաջնահերթություններից են։
![](https://matenadaran.am/wp-content/uploads/2024/04/434487791_828197022669030_2651912175509986078_n.jpg)
![](https://matenadaran.am/wp-content/uploads/2024/04/434988138_828197219335677_3211647873741683233_n-1024x768.jpg)
![](https://matenadaran.am/wp-content/uploads/2024/04/434020890_828196952669037_6774529041668844166_n.jpg)
![](https://matenadaran.am/wp-content/uploads/2024/04/435063642_828197176002348_7080511358652657669_n-1024x768.jpg)